Sa Mhàrt 2020, thàinig air sgiobaidhean Sgoiltean Gnìomhach air feadh na dùthcha ath-smaoineachadh gu tur mun dòigh aca air taic a thoirt do choimhearsnachdan.
Bha sgioba Sgoiltean Gnìomhach ann an Inbhir Àir a Deas a’ toirt taic do chuid de na coimhearsnachdan a bu mhotha a bh’ ann an èis ann an Alba tro fhad a’ phandamaig. Bha iad a’ freagairt do fheumalachdan na coimhearsnachd le bhith a’ cuideachadh le liubhairt bìdhe agus a’ cuideachadh clann sgoile air feadh na roinne - a’ gabhail a-steach bhuidhnean fo chùram agus le ciorram – gu fuireach an sàs ann an spòrs.
A thaobh na bana-ghaisgich ruith-rèisean Cruinneil agus Eòrpach, Kayleigh Haggo, dh’atharraich a dleastanas aig Ionad Spòrs Coimhearsnachd Ghiorbhain gu tur.
Dh’atharraich a’ chuimse gu bhith ag obair air astar le daoine òga agus an teaghlaichean gus an cuideachadh le fuireach gnìomhach, agus bha oidhirpean Kayleigh gun phrìs do mhòran theaghlaichean.
Thuirt Kayleigh: “Bha balach beag againn a chaidh bho bhith gnìomhach trì no ceithir tursan san t-seachdain gu bhith dìomhain. Thug e buaidh mhòr air a chasan, agus mu dheireadh cha b’ urrainn dha coiseachd idir. Chuir a mhàthair fios thugam a ràdh gun robh e a’ strì gu mòr agus a’ faighneachd dè a b’ urrainn dhi a dhèanamh gus fhaighinn a ghluasad a-rithist.
“Fhuair sinn rothair ruith frèama dha. Bha e comasach dha a dhol a-mach air an sin còmhla ri a mhàthair agus a phiuthar gus a chasan fhaighinn a dhol.”
Ann an sgioba Sgoiltean Gnìomhach Inbhir Àir a Deas, thairgs Steven Noble agus Ryan Douglas an ùine gu bhith ag obair a’ liubhairt bìdh tron chiad ghlasadh.
Thuirt Ryan: “B’ e aon de na h-obraichean a bu thlachdmhor a bh’ againn a-riamh, oir bha na daoine uabhasach feumach air a’ bhiadh seo airson iomadh diofar adhbhar.”
Mar a bha cuibhreachaidhean a’ lasachadh beag air bheag, thòisich Ryan agus Steven ag obair le daoine ann an cùram a bha air an comharrachadh a bhith a’ faireachdainn iomallaichte gu sòisealta.
Dh’fhàs seo bho bhall-coise agus teanas sa phàirc, gu sligheadaireachd air an oidhche, canùadh agus seòladh.
Sna 12 mìosan mu dheireadh, bha cothrom aig còrr air 100 neach a bha fo chùram air pàirt a ghabhail ann an spòrs sònraichte.
Thuirt Steven: “Tha e air a bhith sònraichte math a bhith a’ faicinn pàiste a’ tionndadh a-mach agus aig a bheil feum follaiseach air cùram is aire, agus gu h-obann tha iad a’ seòladh bàta a-mach gu muir.”